ខេត្តបន្ទាយមានជ័យ ៖ នាថ្ងៃព្រហស្បតិ៍ សុក្រ ២-៣រោច ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៩-២០ ខែកញ្ញា ឆ្នាំ ២០២៤ ឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងកងរាជអាវុធហត្ថក្រុង ស្រុក ទូទាំងខេត្ត បានប្រារព្ធពិធីបុណ្យកាន់វេនទី ៣ នៅ (វត្តសមាធិផល) ហៅវត្ត (លោកយួន) នៅសង្កាត់ព្រះពន្លាមក ក្រុងសិរីសោភ័ណ្ឌ ខេត្តបន្ទាយមានជ័យ។
ក្នុងឱកាសនោះ ឧត្តមសេនីយ៍ត្រី បោន ប៊ិន បាននាំយកនូវទយវត្ថុ សម្ភារៈប្រើប្រាស់ ទៅប្រគេនដល់ព្រះសង្ឃគង់ចាំព្រះវស្សាអស់ត្រីមាស មានបច្ច័យ ១០.២៧០០០០រ (ដប់លានម្ភៃប្រាំពីរម៉ឺនរៀល) ក្នុងវេននោះដែរ មន្ទីរសុខាពិបាល និងមន្ត្រីសុខាភិបាលស្រុកក្រុងទូទាំងខេត្ត ក៏បានចូលជាបច្ច័យចំនួន ១ លានរៀល ព្រមទាំងទេយ្យវត្ថុមួយចំនួន។
ទន្ទឹមគ្នានោះ ឧត្តមសេនីយ៍ត្រី បោន ប៊ិន ក៏បានមានមតិសំណេះសំណាលជាមួយ ព្រះសង្ឃ លោកយាយ លោកតា បងប្អូន ប្រជាពលរដ្ឋ។ ហើយក៏បានជូនពរដល់លោក លោកស្រី មន្ត្រីប៉េអឹមក្រោមឱវាទទាំងអស់ ដែលបានចូលរួមបុណ្យ សូមអនុមោទនាយកផល បុណ្យដែលបានធ្វើថ្ងៃនេះ តាមកម្លាំង សទ្ធារៀងៗខ្លួនជាពិសេស សូមឲ្យជួបតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕