ព្រៃវែង ៖ ក្រុមហ៊ុន អង្គរសុខសារិទ្ធិមានជ័យ ដែលគេស្គាល់ថា ជាក្រុមហ៊ុនរបស់លោក ឧកញ្ញ៉ា ជឹម សុខ ដែលនាំជ្រូក គោ ក្របី ចេញទៅក្រៅប្រទេសនោះ កំពុងតែអង្គុយចាំ ដកតុង ពីប្រជាពលរដ្ឋ ដែលលោកបានយក សត្វ គោ ក្របី ទៅលក់ នៅតំបន់ច្រករបៀង ស្វាយ អាង៉ោង ស្ថិតក្នុងភូមិ រោង ឃុំចាម ស្រុក កំពង់ត្របែក ខេត្តព្រៃវែង ដោយ ក្នុងមួយថ្ងៃ ចាប់ពី 5 ទៅ 6 ឡាន ក្នុងមួយឡានៗ ផ្ទុកជ្រូក ពី 270 ក្បាល ទៅ 300ក្បាល ចំណែកគោនិងក្របីក្នុងមួយថ្ងៃៗប្រហែលចាប់ពី450ទៅ500ក្បាលដែលមានទាំងតូចទាំងធំ។
ប្រជាពលរដ្ឋរសនៅក្នុងភូមិ រោង ឃុំចាម ស្រុក កំពង់ត្របែក ខេត្តព្រៃវែង ក៏ដូចប្រជាពលរដ្ឋនៅជុំវិញតំបន់ច្រករបៀង ស្វាយអាង៉ោង និង ប្រជាពលរដ្ឋដែលឆ្លងកាត់ តែងតែមានការរអ៊ូរទាំក្លិនស្អុយជ្រូកងាប់របស់លោក ឧកញ្ញ៉ា ជឹម សុខ ដែលចោលរាយប៉ាយក្បែក្រោលគោក្នុងច្រកស្វាយអាង៉ោងដែលធ្វើឲ្យប្រជាពលរដ្ឋនៅក្នុងតំបន់នោះបានត្អូញត្អែប្រាប់សារពត៌មានយើងថាពួកគាត់រាល់ថ្ងៃពិបាកទ្រាំនិងក្លិនស្អុយ ហើយ ក៏មានការភ័យខ្លាចនិងព្រួយបារម្ភថា ក្រែងជ្រូកទាំងនោះមានជំងឺហើយឆ្លងរាលដាលដល់ជ្រូកនិងសត្វពាហនៈរបស់ពួកគាត់ចិញ្ចឹមនៅទីនោះ
ប្រជាពលរដ្ឋនៅក្នុងតំបន់នោះក៏បានសំណូមពរដល់អាជ្ញាធរដែលពាក់ព័ន្ធមេត្តាចុះត្រួតពិនិត្យនិងមើលជ្រូកនិងគោរបស់លោក ឧកញ្ញ៉ា ជឹម សុខ ជាពិសេសគឺជ្រូកដែលគាត់តែងតែឃើញងាប់ជារឿយៗហើយសូមយកទៅកប់ឲ្យបានត្រឹមត្រូវផង ដើម្បីកុំឲ្យមានជះក្លិនស្អុយមកដល់ពួកគាត់។
ជុំវិញបញ្ហាជ្រូកងាប់ខាងលើនេះលោក ឧកញ៉ា ជឹម សុខ បានបញ្ជាក់ប្រាប់សារព័ត៌យើងឲ្យដឹងថា លោក មុននិងដឹកចេញមកពីប្រទេសថៃគឺបានត្រួតពិនិត្យពីបសុពេទ្យត្រឹមត្រូវច្បាស់លាស់អស់ហើយ ជ្រូកទាំងនេះគ្មានជំងឺអ្វីនោះទេ ហើយធម្មតាទេជ្រូកពេលដឹកឆ្ងាយគឺតែងតែមានងាប់អញ្ចឹងហើយ ។
ចំពោះរឿងគោក្របី បើ យោងតាមប្រភពបានបញ្ជាក់ប្រាប់ថា សម្រាប់អាជីវករដែលនាំគោក្របីចេញទៅក្រៅប្រទេសត្រូវបង់លុយចូលក្រុមហ៊ុនរបស់លោក ឧកញ្ញ៉ា ជឹម សុខ ក្នុងមួយក្បាល 60000៛ ឯនោះ ដោយលោកឧកញ្ញ៉ា បានមានប្រសាសន៍ថា លុយ60000៛ ក្នុងមួយក្បាលនេះ ក្រុមហ៊ុនរបស់លោក បានយកទៅចំណាយលើសេវ៉ាកម្ម ផ្សេងៗដូចជា ថ្លៃដឹងជញ្ជួន ថ្លៃសំបុត្របញ្ជាក់ពីភូមិ ឃុំ នឹងពេទ្យសត្វ នៅតាមតំបន់ / ល/ ។ ប៉ុន្តែផ្ទុយទៅវិញ ប្រជាពលរដ្ឋ ដែលលោកដឹកជញ្ជួនសត្វ គោ ក្របី មកលក់នៅតំបន់ស្វាយអង៉ោងនេះ បានប្រាប់សារព័ត៌មានយើងថា ថ្លៃសេវ៉ាកម្មផ្សេងៗខាងលើនេះ លោកបានចំណាយលុយហោប៉ៅខ្លួនឯងទេ មិនបានពាក់ពាន់ នឹងប្រាក់ 60000៛ នេះឡើយ ។ គឺលោកឧកញ្ញ៉ាចាំតែដកតុង 60000៛ ក្នុង មួយក្បាលនេះ មិនដឹងថាលោកចំណាយទៅលើអ្វីខ្លះនោះឡើយ ? គូររំលឹកផងដែរថា កន្លងមក ក្រុមហ៊ុនមួយនេះ ដកតុង រហូតដល់ទៅ 120,000៛ ឯនោះក្នុងមួយក្បាលសត្វ គោ ក្របី ទើបតែចុះថ្លៃសល់60000៛ ក្នុងរយៈពេលប៉ុន្មានខែចុងក្រោយនេះប៉ុណ្នោះ។
មហាជន មានចំងល់ថា! ហេតុអ្វី បានជាក្រុមហ៊ុន ឯកជនមួយនេះ មានសិទ្ធិ ចាំប្រមូល ឬ ចាំដកពន្ធ ពីប្រជាពលរដ្ឋ ដែលលោក ត្រូវលក់ គោ ក្របី ដើម្បីយកប្រាក់ដោះស្រាយជីវភាព? ។ ប្រជាពលរដ្ឋខ្លះបានរអ៊ូរទាំថា ពួកគាត់ចិញ្ចឹម គោ ឬ ក្របី មួយក្បាល ត្រូវជំពាក់លុយ លោក ជឹម សុខ ពី 60,000៛ ទៅ 120,000 រូចជាស្រេចទៅហើយ ។ បើតាមការស្តាប់ប្រជាពលរដ្ឋ រអ៊ូ រទាំ នឹងក្រុមហ៊ុន កំពុងធ្វើដូចសព្វថ្ងៃ លោក ជឹម សុខ គឺកំពុងតែ ធ្វើស្រែ លើ ខ្នង រាស្ត្រ ហើយ៕
សារព័ត៌មានយើងនិងរីករាយក្នុងការទទួលឆ្លើយបំភ្លឺពីសាមីខ្លួនដែលពាក់ព័ន្ធជានិច្ច៕
(នង សំ)
