(ភ្នំពេញ)៖ នៅព្រឹកថ្ងៃទី ២៧ ខែមិថុនា ឆ្នាំ២០១៩នេះ មានប្រារព្ធពិធីតែងតាំង និងចូលកាន់មុខតំណែង អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ក្រោមអធិបតីភាពដ៏ខ្ពង់ខ្ពស់របស់ ក្រោមអធិបតីភាពឧបនាយករដ្ឋមន្ដ្រីប្រចាំការ ប៊ិន ឈិន រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២៤ ខែមិថុនា ឆ្នាំ២០១៩ បានចេញសេចក្តីសម្រេចមួយ តែងតាំងលោក គន់ គីម ជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ជំនួសលោក ញឹម វណ្ណដា ដែលត្រូវបានដកចេញពីតំណែង។
សេចក្តីសម្រេចនេះក៏បានបញ្ចប់តំណែង លោក ញឹម វណ្ណដា ពីអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយផងដែរ។
មូលហេតុដែលដកតំណែង លោក ញឹម វណ្ណដា ត្រូវបានសម្តេចតេជោ ហ៊ុន សែន បញ្ជាក់ថា ដោយសារតែខ្វះការទទួលខុសត្រូវ និងភូតភរ ក្រោយឧបទ្ទហេតុ រំលំបាក់អគារ៧ជាន់ ដែលបណ្តាលឲ្យមនុស្សស្លាប់ និងរបួសរាប់សិបនាក់។
ក្នុងតួនាទីជា អគ្គលេខាធិការសមាគមអតីតយុទ្ធជនកម្ពុជា គេងសង្កេតឃើញថា លោក គន់ គីម បានបំពេញការងារយ៉ាងសស្រាក់សស្រាំដើម្បីចុះទៅដល់មូលដ្ឋាន ក្នុងគោលបំណងស្វែងយល់ពីជីវភាព និងការរស់នៅប្រចាំថ្ងៃរបស់សមាជិក សមាគមអតីតយុទ្ធជនកម្ពុជា ព្រមទាំងដោះស្រាយនូវបញ្ហាប្រឈមមួយចំនួនទៀតផងដែរ ។
គួរជម្រាបថា បច្ចុប្បន្នទេសរដ្ឋមន្ដ្រី គន់ គីម មានតួនាទីជា អគ្គលេខាធិការសមាគមអតីតយុទ្ធជនកម្ពុជា ដែលមានសម្ដេចតេជោ ហ៊ុន សែន ជាប្រធានសមាគម ៕