ខេត្តព្រះវិហារ ៖ ប្រភពពីមន្ត្រីដែលធ្វើការនៅសាលាស្រុកត្បែងមានជ័យ នៃខេត្តព្រះវិហារដែលថ្លែងសុំមិនបញ្ចេញឈ្មោះបានឲ្យដឹងថា រហូតមកដល់ពេលនេះបទល្មើសកាប់ឈើដែលកើតឡើងយ៉ាងរាលដាលនៅតែបន្តធ្វើសកម្មភាពទាំងយប់ទាំងថ្ងៃ ដែលសកម្មភាពទាំងនេះគឺត្រូវបានគេសង្កេតឃើញថា មិនចាញ់នឹងការកាប់បំផ្លាញនៅឯព្រៃឡង់នៃខេត្តកំពង់ធំនោះទេ។
ប្រភពខាងលើបានបន្តទៀតថា មេឈ្មួញដែលធំដែលសកម្មជាងគេគឺមានឈ្មោះរឿ,ឈ្មោះស៊ី,ឈ្មោះចែណាង,និងឈ្មោះសាក់ ស៊ិច ឈ្មួញទាំងនេះបានកេណ្ឌប្រជាពលរដ្ឋដើម្បីឲ្យចូលទៅក្នុងព្រៃព្រះការដើម្បីធ្វើការកាប់និងដឹកជញ្ជូនឈើយកមកលក់ឲ្យពួកគេ។
ប្រភពដដែលបានបញ្ជាក់ទៀតថាមេឈ្មួញធំៗខាងលើនេះមានគោយន្តសម្រាប់ដឹកចេញពីព្រៃរាប់សិបគ្រឿងនិងមានរទេះក្របី រាប់សិបគ្រឿងផងដែរសម្រាប់ដឹកជញ្ជូនឈើចេញពីព្រៃទាំងរដូវប្រាំងនិងរដូវវស្សារហើយការដឹកជញ្ជូនឈើទាំងនោះគឺគេសង្កេតឃើញថាតែងតែឆ្លងកាត់មុខស្នាក់ការបរិស្ថានដែលឈរជើងនៅហ្នឹងតំបន់ព្រៃព្រះរកាតែមន្ត្រីបរិស្ថានទាំងនោះហាក់ដូចជាធ្វើមិនឃើញហើយរក្សាភាពស្ងៀមស្ងាត់ដូចជាពុំមានចំណាត់ការអ្វីទៅលើក្រុមឈ្មួញទាំងនោះឡើយ។
ប្រភពចេញពីក្រុមរទេះក្របីដែលចាំដឹកជញ្ជូនឈើឲ្យថៅកែខាងលើបានឲ្យដឹងដែលថាពួកគាត់មានរទេះក្របីសម្រាប់ដឹកជញ្ជូនឈើដើម្បីយកទៅឲ្យថៅកែទាំងនោះហើយថៅកែទាំងនោះក៏បានកាងនិងបង់ប្រាក់ទៅឲ្យមន្ត្រីបរិស្ថាននិងជាពិសេសសមត្ថកិច្ចពាក់ព័ន្ធដែលស្ថិតនៅក្នុងស្រុកត្បែងមានជ័យខេត្តព្រះវិហារដូច្នេះហើយទើបពួកគេហ៊ានដឹកជញ្ជូនឈើទាំងយប់ទាំងថ្ងៃដោយពុំខ្លាចនឹងការចាប់ពីមន្ត្រីពាក់ព័ន្ធនោះទេ។
ប្រភពខាងលើនេះបានបញ្ជាក់ទៀតថា មេឈ្មួញឈើខាងលើមានទីតាំងស្តុកឈើជាច្រើនកន្លែងមានដូចជានៅក្នុងភូមិពោប្រមេភូមិពោធិ៍ទៀបនិងភូមិកំពតក្បែរចម្ការអំពៅក្រុមហ៊ុនចិនស្ថិតក្នុងស្រុកត្បែងមានជ័យខេត្តព្រះវិហារ។
កត្តាទាំងនេះហើយទើបគេដាក់ការសង្ស័យថា លោកអៀសុខាប្រធានបរិស្ថានខេត្តព្រះវិហារអាចនឹងមានរឿងពាក់ព័ន្ធជាមួយក្រុមដឹកជញ្ជូនឈើកាប់ឈើចេញពីព្រៃព្រះរកាទើបបណ្ដាលឲ្យមេឈ្មួញទាំង៥ នាក់ខាងលើនេះធ្វើការដឹកជញ្ជូនឈើគ្មានញញើតដៃអ្វីសោះ។
រីឯលោកអ៊ុនចិន្តាអភិបាលខេត្តព្រះវិហារនៅតែបន្តភាពស្ងៀមស្ងាត់ពុំដែលឃើញមានបញ្ចេញកណ្ដាប់ដៃបង្ក្រាបបទល្មើសព្រៃឈើឱ្យមានប្រសិទ្ធភាពនិងទ្រង់ទ្រាយធំនោះទេកត្តាទាំងនេះហើយទើបមានសេចក្ដីអំពាវនាវចេញពីប្រជាពលរដ្ឋនៅក្នុងស្រុកត្បែងមានជ័យក៏ដូចជាក្នុងខេត្តព្រះវិហារទាំងមូលសំណូមពរដល់លោក អ៊ុន ចិន្តា អភិបាលខេត្តព្រះវិហារ ដើម្បីចាត់វិធានការទៅលើក្រុមឈ្មួញបំផ្លាញព្រៃឈើដែលនៅសេសសល់បន្តិចបន្តួចផង៕