(ខេត្តកំពត)៖ បន្ទាប់ពីមានអាកាសធាតុក្ដៅអួរអ័ព្ទរយៈពេលប៉ុន្មានថ្ងៃកន្លងមកនេះ។ នៅយប់ថ្ងៃទី២៧ឈានចូលថ្ងៃទី២៨ខែមេសាឆ្នាំ២០១៩ នៅក្រុងកំពតខេត្តកំពតមានភ្លៀងធ្លាក់មួយមេយ៉ាងធំបណ្ដាលឲ្យលិចផ្លូវនិងទីសាធារណៈខ្លះៗព្រមទាំងទឹកហូរហៀរចូលផ្ទះប្រជាពលរដ្ឋនៅក្នុងសង្កាត់មួយចំនួននៃក្រុងកំពត។
ដោយបានជ្រាបនូវបញ្ហាកង្វល់នេះ លោក ជាវ តាយ អភិបាលនៃគណៈអភិបាលខេត្ត និងមន្ត្រីជំនាញពាក់ព័ន្ធ រួមនិងអាជ្ញាធរមូលដ្ឋានចុះពិនិត្យស្ថានភាពជាក់ស្ដែងលើប្រព័ន្ធលូបង្ហូរទឹកនិងទីតាំងរំដោះទឹកក្នុងក្រុងដែលស្ថិតនៅសង្កាត់ក្រាំងអំពិលក្រុងកំពត។
បន្ទាប់ពីបានស្ដាប់ការលើកឡើងពីហេតុផលនិងបញ្ហាផ្សេងៗនូវមតិជំនាញក៏ដូចក្រុមហ៊ុនសាងសង់រួមនឹងអាជ្ញាធរនិងប្រជាពលរដ្ឋក្នុងមូលដ្ឋានដើម្បីធ្វើការរំដោះទឹកឲ្យបានឆាប់រហ័សពីការលិចលង់ក្រុងនៅពេលភ្លៀងធ្លាក់ម្ដងៗនោះ លោក ជាវ តាយ អភិបាលខេត្ត បានបញ្ជាក់ថា៖ បញ្ហាប្រព័ន្ធលូក្នុងក្រុងកំពតនេះគឺជាបញ្ហា ដែលអាជ្ញាធរខេត្ត និងក្រុងកំពតរួមនិងជំនាញពាក់ព័ន្ធតែងតែមានការគិតគូរជាប្រចាំងរកការដោះស្រាយជាបន្តបន្ទាប់កន្លងមកដើម្បីរកវិធីរំដោះទឹកនូវពេលមានភ្លៀងធ្លាក់ម្ដងៗធ្វើឲ្យជន់លិចផ្លូវនិងទីសាធារណៈមួយចំនួនក្នុងក្រុង។
លោកអភិបាលខេត្តក៏បានណែនាំជំរុញដល់ជំនាញនិងអាជ្ញាធរមូលដ្ឋាន ធ្វើយ៉ាងណាដើម្បីរកដំណោះស្រាយជាបន្ទាន់នៅចំពោះមុខនេះត្រូវកាយផ្លូវរំដោះទឹកឲ្យបានជាការប្រញាប់បញ្ជៀសការលិចលង់ក្នុងក្រុងនេះ ហើយក្នុងដំណាក់កាលបន្ទាប់នេះត្រូវតែស្ដារព្រែកចាក និងសាងសង់ស្ថានីយ៍បូមរំដោះទឹកក្នុងក្រុងនៅពេលភ្លៀងធ្លាក់មកពិសេសក្នុងរដូវវស្សាមានភ្លៀងធ្លាក់ច្រើន។
លោក ជាវ តាយ អភិបាលខេត្តបានដាក់ផែនការឲ្យចៅសង្កាត់ក្រាំងអំពិល កាយស្ដារព្រែកចាកធម្មជាតិនេះដែលជាផ្លូវរំដោះទឹកក្នុងក្រុងមានចំងាយជិត២គីឡូម៉ែត្ មានតម្លៃប្រមាណ១៤ម៉ឺនដុល្លា ក្រោមថវិកាផ្ដល់ដោយ លោក ជាវ តាយអភិបាលខេត្តរួមប្រព័ន្ធផ្លូវលូនៅតំបន់នោះផងដែរ។
គួររំលឹកដែរថា៖ បញ្ហាប្រព័ន្ធលូបង្ហូរទឹកនៅក្នងក្រុងកំពតប៉ុន្មានឆ្នាំចុងក្រោយនេះពេលមានភ្លៀងធ្លាក់មកតែងតែមានការលិចផ្លូវថ្នល់ឬហូរចូលផ្ទះប្រជាពលរដ្ឋមួយចំនួននៅតំបន់ខ្លះៗដែលបញ្ហានេះធ្វើឲ្យប្រជាពលរដ្ឋរអ៊ូរទាំស្ដីបន្ទោសថាអាជ្ញាធរនិងជំនាញមិនមានការយកចិត្តទុកដាក់ដោះស្រាយ។ ពិសេសប្រជាពលរដ្ឋថាលូមេបង្ហូររំដោះទឹកមួយខ្សែប្រភេទលូជ្រុងមានកម្ពស់លិចក្បាលកប់ក្រោមថ្នល់ ប្រគល់ឲ្យក្រុមហ៊ុនមួយដើម្បីទទួលការសាងសង់ មិនឃើញមានទាំងអាជ្ញាធរមានសមត្ថកិច្ចមូលដ្ឋាន និងជំនាញមកចុះត្រួតពិនិត្យ ឬឲ្យដាក់លូរណបឬរឺហ្គាបង្ហូរទឹកចូលលូធំនេះទេដែលទាំងទឹកប្រើប្រាស់ប្រចាំថ្ងៃរបស់គាត់នៅម្ដុំផ្សាររុយចាស់មិនដឹងហូរទៅណាឡើយ ហើយនៅពេលភ្លៀងធ្លាក់ទឹកភ្លៀងហូរចូលផ្ទះរបស់គាត់តែម្ដងដែលបញ្ហានេះត្រូវបានប្រជាពលរដ្ឋរាយការណ៍ត្រង់ជូនលោកអភិបាលខេត្តផងដែរ ខណៈមានបញ្ហាប្រឈមបែបនេះ៕ សេង ណារិទ្ធ