(ខេត្តកំពត) នៅរសៀលថ្ងៃអាទិត្យ ៥រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៤ ខែកុម្ភៈ ឆ្នាំ២០១៩ លោកជួន សុភា អភិបាលរងស្រុកកំពង់ត្រាច អមដំណេីរដោយលោក ទិន សម្បត្តិ សមាជិកក្រុមប្រឹក្សាស្រុក និងលោក ស្រី អាន់ មេឃុំបឹងសាលាខាងជេីង បានចុះពិនិត្យគម្រោងជីកប្រឡាយមេមួយខ្សែប្រវែង៤.០០០ម តភ្ជាប់ពីប្រឡាយកៅវ៉ាក់ឃុំព្រែកក្រឹស ឆ្លងកាត់ចំនួន២ឃុំ គឺឃុំបឹងសាលាខាងជេីង ប្រវែង២.៥០០ម និងឃុំភ្នុំប្រាសាទប្រវែង១.៥០០ម ដែលមានការគាំទ្រដោយក្រសួងធនធានទឹក និងឧត្តុនិយម។
ជាមួយគ្នានេះ លោក ជួន សុភា អភិបាលរងស្រុកកំពង់ត្រាច បានលើកឡើងថា ការជីកប្រឡាយមេខាងលើនេះ គឺជាគម្រោងមួយដែលត្រូវបានបងប្អូនប្រជាពលរដ្ឋ ស្ថិតក្នុងឃុំបឹងសាលាខាងជើង និងឃុំភ្នំប្រាសាnទ ធ្វើការស្នើសុំ តាមរយៈវេទិកាសាធារណៈថ្នាក់ជាតិកាលពីឆ្នាំ២០១៧កន្លងមក។ដូច្នេះដើម្បីតបតាមសំណូមពរ និងតម្រូវការទឹកសម្រាប់ប្រើប្រាស់ ក៏ដូចជាការបម្រើលើវិស័យកសិកម្មឲ្យកាន់តែមាននិរន្តរភាពទើបក្រុមការងារចាប់ផ្តើមអនុវត្តនូវគម្រោងខាងលើតែម្តង។
សូមជម្រាបថា គម្រោងជីកប្រឡាយមេខាងលើ ត្រូវបានបងប្អូនប្រជាពលរដ្ឋឃុំបឹងសាលាខាងជើង និងឃុំភ្នំប្រាសាទ ស្នើឡើងតាមរយៈវេទិកាសាធារណៈថ្នាក់ជាតិនៅឆ្នាំ ២០១៧ នៅវត្តព្រៃទប់ ក្រោមអធិបតីភាពរបស់ លោក អុីវ ផល្លី អនុរដ្ឋលេខាធិការក្រសួងព័ត៌មាន និងជាប្រធានក្រុមការងារថ្នាក់ខេត្តចុះមូលដ្ឋានស្រុកកំពង់ត្រាច ខេត្តកំពត៕ សេង ណារិទ្ធ