កណ្តាល ៖ ផ្ទះ១ខ្នងធ្វើអំពើឈើប្រកសង្ក័សី និងទ្រសម្បត្តិមួយចំនួនទៀត ត្រូវអគ្គីភ័យឆាបឆេះអស់ និងរាល់ដាលដល់ផ្ទះមួយខ្នងទៀតរងការខូចខាតមួយចំនួនផងដែរ ។ ហេតុការភ្ញាក់ផ្អើលនេះកើតឡើងកាលពីរសៀលថ្ងៃទី២០ ខែកុម្ភៈ ឆ្នាំ២០១៩ នៅក្នុងភូមិលេខ២ ឃុំស្វាយរលំ២ ស្រុកស្អាង ខេត្តកណ្តាល ។
កម្លាំងនគរបាលប៉ុស្ដិ៍ស្វាយរលំ ជួយធ្វើការសង្គ្រោះម្ចាស់ផ្ទះ បានទាន់ពេលវេលានិងជួយចាញ់ទឹកពន្លត់ហើយ មានការជួយគាំទ្រអន្ដរាគមន៍ ពីរថយន្ដពន្លត់អគ្គីភ័យរបស់ស្នងការដ្ឋាននគរបាលខេត្តកណ្ដាល បានទាន់ពេលវេលា ដោយប្រើរថយន្ដពន្លត់អគ្គីភ័យអស់ចំនួន០១គ្រឿងអស់ទឹកចំនួន១០គីប។ ហើយអគ្គីភ័យបានរលត់ចប់សព្វគ្រប់នៅវេលាម៉ោង១៧និង៣០នាទី នាថ្ងៃខៃឆ្នាំដដែល។
បន្ទាប់មកកងកម្លាំងប៉េអឹមស្រុកស្អាង ដែលដឹកនាំដោយលោកអនុសេនីយ៍ឯក អ៊ូ ផល្លី មេបញ្ជាការប៉េអឹមស្រុកស្អាង ចុះមកនាំខ្លួន ទៅសាកសួរចម្លើយ បានឲ្យដឹងថា ផ្ទះដែលរងការឆាបឆេះ នេះមានទំហំ៦ម៉ែត្រ គុណ ៧ម៉ែត្រ ធ្វើអំពីឈើប្រកសង្ក័សី ម្ចាស់ផ្ទះ តាត់ ភឿន ភេទស្រីអាយុ៥៦ឆ្នាំមានមុខរបរជាកសិករ រស់នៅក្នុងភូមិ ឃុំកើតហេតុ ។ ចំណែក លោកកូនចិត្តឃោរឃៅនោះ ឈ្មោះ ភី រ៉ុង ភេទប្រុសអាយុ២៤ឆ្នាំ មានមុខរបរមិនពិតប្រាកដ ។ ចំណែកផ្ទះ១ខ្នងទៀតត្រូវបានរងការឆាបឆេះខូចខាតមួយចំនួនផងដែរ ធ្វើអំពីថ្ម ដំបូលចាក់បេតុ ទំហំ៥,៥ គុណនិង១២ម៉ែត្រ ម្ចាស់ផ្ទះមិនស្គាល់ឈ្មោះ ។
លោកថា ដោយសារបុរសម្នាក់នេះប្រើប្រាសថ្នាំញៀនទើបយកភ្លើងដុតផ្ទះខ្លួនឯងឆេះខ្ទេច ។ ក្រោយធ្វើសកម្មភាពដុតផ្ទះរួច ជនសង្ស័យត្រូវបានកម្លាំងអាវុធហត្ថ ស្រុកស្អាងឃាត់ខ្លួនមកសាកសួរ។
លោកបានបន្តថា ផ្ទះមួយខ្នងត្រូវឆាបឆេះ អស់ទាំងស្រុង ព្រោះពិបាកគ្មានផ្លូវចូលរថយន្តពន្លត់អគ្គិភ័យរួច និងបានប្រើប្រាស់រថយន្តពន្លត់ អគ្គីភ័យរបស់ស្នងការខេត្តកណ្តាល ចំនួន១គ្រឿង បាញ់ទប់ស្កាតកុំឲ្យឆេះរាល់ដាល៕
ដោយ ហុក វិបុល