(ខេត្តកែប)៖ ពិធីបុណ្យមាឃបូជា តែងតែត្រូវបានធ្វើឡើងនៅថ្ងៃ១៥កើត ខែមាឃ ជារៀងរាល់ឆ្នាំ ហើយពិធីបុណ្យសាសនាមួយនេះ មានសារៈសំខាន់ណាស់នៅក្នុងពុទ្ធិសាសនា ប្រហាក់ប្រហែលនឹងបុណ្យពុទ្ធសាសនាដទៃទៀតដែរ។ ពិធីបុណ្យនេះក្នុងគោលបំណងពីរគឺ៖ ទី១- ដើម្បីរំលឹកដល់ថៃ្ងចតុរង្គសន្និបាត ដែលព្រះសម្មាសម្ពុទ្ធ ទ្រង់ប្រកាសបង្កើតព្រះពុទ្ធសាសនាឡើង និងទី២- ដើម្បីរំលឹកដាក់អាយុសង្ខារ នៃការចូលព្រះបរិនិព្វានរបស់ទ្រង់។
ដោយឡែក នៅខេត្តកែប នារសៀលថ្ងៃអង្គារ១៥កើត ពេញបូណ៌រមី ខែមាឃ ឆ្នាំច សំរឹទ្ធស័ក ពុទ្ធសករាជ២៥៦២ ត្រូវនឹងថ្ងៃទី១៩ ខែកុម្ភៈឆ្នាំ២០១៩ លោក កែន សត្ថា អភិបាលនៃគណៈអភិបាលខេត្តកែប និងលោក ទេព យុទ្ធី សមាជិកព្រឹទ្ធសភាមណ្ឌលភូមិភាគ៥ ព្រមទាំងអភិបាលរងខេត្តជាច្រើនរូប រួមនិងព្រះសង្ឃនិងមន្ត្រីរាជការគ្រប់ជាន់ថ្នាក់ព្រមទាំងពុទ្ធសាសនិកជន ក្នុងខេត្ត បាននរួមគ្នាប្រារព្ធពិធីបុណ្យមាឃបូជានេះដោយដង្ហែពីវិមានឯករាជ្យខេត្ត ឆ្ពោះទៅកាន់មជ្ឈមណ្ឌលវិបស្សនាធុរៈខេត្តកែប។
ក្នុងឱកាសនោះ លោក កែន សត្ថា អភិបាលខេត្ត ក៏បានគូសបញ្ជាក់ថា រាជរដ្ឋាភិបាលនៃព្រះរាជាណាចក្រកម្ពុជាក្រោមការដឹកនាំរបស់សម្ដេចតេជោ ហ៊ុន សែន ជានាយករដ្ឋមន្ត្រី តែងតែបើកនូវសិទ្ធិទូលំទូលាយផ្ដល់ឱកាសដល់ពលរដ្ឋទូទៅ ដោយមិនមានការរើសអើងឬរិតត្បិតនូវជំនឿសាសនាអ្វីឡើយ។ ជាក់ស្ដែងបុណ្យមាឃបូជានេះ ត្រូវបានរាជរដ្ឋាភិបាលកម្ពុជា កំណត់ចូលជាបុណ្យជាតិរបស់កម្ពុជាផងដែរ ដោយនៅថ្ងៃប្រារព្ធបុណ្យនេះ រាជរដ្ឋាភិបាលបានអនុញ្ញាតឲ្យមន្ត្រីរាជការ សិស្សានុសិស្ស រួមទាំងវិស័យឯកជន ឈប់សម្រាកមួយថ្ងៃ។ ដោយឡែកសម្រាប់ខេត្តកែប រដ្ឋបាលខេត្តតែងតែបានដឹកនាំប្រារព្ធធ្វើឡើងជារៀងរាល់ឆ្នាំ ដោយមានការចូលរួមពីពុទ្ធសាសនិកជនគ្រប់មជ្ឈដ្ឋានចូលរួមពិធីបុណ្យសាសនាដ៏សំខាន់មួយនេះ។ លោកអភិបាលខេត្តក៏បានឧទ្ទិសកុសលផលបុណ្យដែលកើតចេញពីសទ្ធាជ្រះថ្លារបស់ពុទ្ធបរិស័ទក្នុងកម្មវិធីបុណ្យនេះជូនដល់ប្រជាពលរដ្ឋទូទៅក្នុងខេត្តកែប ជួបតែសេចក្ដីសុខគ្រប់ប្រការ និងបានអំពាវនាវឲ្យមានការចូលរួមសាមគ្គីគ្នាជាធ្លង់មួយក្នុងកិច្ចអភិវឌ្ឍន៍ខេត្តឲ្យបានកាន់តែរីកចម្រើនថែមទៀតក្រោមម្លប់នៃសុខសន្តិភាពរបស់ប្រទេសជាតិនាពេលបច្ចុប្បន្ន ដែលដឹកនាំដោយសម្ដេចតេជោហ៊ុន សែនជានាយករដ្ឋមន្ត្រីតរៀងទៅ។
សូមបញ្ជាក់ថា៖ កម្មវិធីបុណ្យត្រូវបានឆ្លងបញ្ចប់នៅព្រឹកថ្ងៃទី២០ខែកុម្ភៈឆ្នាំ២០១៩ក្រោមការចូលរួមរាប់បាតពីសំណាក់ លោក កែន សត្ថា អភិបាលខេត្ត ព្រមទាំងថ្នាក់ដឹកនាំមន្ត្រីរាជការគ្រប់ឋានានុក្រមនិងពុទ្ធបរិស័ទក្នុងខេត្តកែបទាំងមូល៕
សេង ណារិទ្ធ