(ខេត្តកំពត)៖ ប្រជាពលរដ្ឋដែលមានលំនៅស្ថានក្បែរដងស្ទឹងកែវ ក្នុងឃុំស្ទឹងកែវ ស្រុកទឹកឈូ ខេត្តកំពត បច្ចុប្បន្នបាននិងកំពុងសំដែងក្តីព្រួយបារម្ភ នូវសកម្មភាពបូមខ្សាច់ ដែលកន្លងមកអ្នកធ្វើអាជីវកម្មបានដាក់ម៉ាសីុនបូមរូងយកខ្សាច់មានជម្រៅកាន់តែជ្រៅស្ទើគ្រប់កន្លែង។
តាមប្រភពព័ត៌មានពីពលរដ្ឋនៃឃុំខាងលើបានបញ្ជាក់ថា សព្វថ្ងៃនេះនៅក្នុងតំបន់ស្ទឹងកែវមានម្ចាស់អាជីវកម្មបូមខ្សាច់ចំនួន៣កន្លែង ប៉ុន្តែគេមិនដឹងថាម្ចាស់អាជីវកម្មខាងលើ មានច្បាប់ទម្លាប់ត្រឹមត្រូវឬយ៉ាងណានោះឡើយ។ម្យ៉ាងទៀតសកម្មភាពបូមខ្សាច់ស្ថិតក្នុងភូមិសាស្ត្រនេះពិតជាមានភាពគគ្រឹកគគ្រេង ដោយម្ចាស់ទីតាំងប្រើសុទ្ធតែគ្រឿងចក្រទំនើបសម្រាប់ទាញយកផលអាជីវកម្មនេះ ដោយលក់ខ្សាច់ក្នុង១ម៉ែត្រគូបតម្លៃចាប់ពី៥ទៅ៦ដុល្លារ។
យ៉ាងណាមិញសកម្មភាពបូមខ្សាច់ស្ថិតក្នុងភូមិសាស្ត្រខាងលើ ពិតជាកើតមានជាច្រើនឆ្នាំមកហើយដែលធ្វើឲ្យពលរដ្ឋដែលមានផ្ទះសំបែងជាប់នឹងដងស្ទឹងកែវកាន់តែព្រួយបារម្ភពីមួយថ្ងៃទៅមួយថ្ងៃ ព្រោះខ្លាចក្រែងមានហានិភ័យកើតឡើងដោយយថាហេតុ ផ្តើមពីការបូមរូងយកខ្សាច់របស់ម្ចាស់អាជីវកម្មទាំងនោះ។ជាមួយនឹងក្តីបារម្ភនេះដែរ ពលរដ្ឋសំណូមពរដល់មន្ត្រីជំនាញ គួរចុះមកពិនិត្យមើលពីស្ថានភាពនៅចំណុចទីតាំងបូមខ្សាច់នៅឃុំស្ទឹងកែវ ស្រុកទឹកឈូ នេះផង តើម្ចាស់អាជីវកម្មអនុវត្តត្រឹមត្រូវតាមគោលការណ៍របស់ជំនាញដែរឬទេ?។
ទាក់ទិននឹងករណីដូចខាងលើ នៅព្រឹកថ្ងៃទី១៦ ខែកុម្ភៈ ឆ្នាំ២០១៩នេះ កម្ពុជាថ្មី មិនអាចសុំការពន្យល់ពីលោក សោម វិចិត្រ ប្រធានមន្ទីររ៉ែ និងថាមពលខេត្តកំពតបានទេ ដោយសារទូរស័ព្ទរបស់លោកប្រធានស្ថិតក្នុងតំបន់ក្រៅសេវា៕
សេង ណារិទ្ធ