(ខេត្តកំពត)៖ មានករណីចោរចូលកាត់សោរទ្វាររបងលួចរថយន្តទំនើប១គ្រឿងទៀតហើយ ស្ថិតក្នុងទីប្រជុំជនក្រុងកំពត ខណៈម្ចាស់រថយន្តកំពុងដេកលង់លក់ក្នុងពេលរាត្រី។
តាមការរៀបរាប់ពីសំណាក់ម្ចាស់ផ្ទះនិងជាម្ចាស់រថយន្ត ឈ្មោះ ស៊ុយ សីុដេត ភេទប្រុស អាយុ៤១ឆ្នាំ និងប្រពន្ធឈ្មោះ លិន សូណាន់ មានផ្ទះនៅចំណុចទីតាំងបាត់រថយន្ត ស្ថិតក្នុងភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត បានបញ្ជាក់ថា ករណីចោរលួចរថយន្តនេះ នៅវេលាម៉ោង១២និង៥០នាទីយប់ រំលងអាធ្រាតឈានចូលថ្ងៃទី១៣ខែកុម្ភៈ ឆ្នាំ២០១៩ ហើយការដឹងព្រីណីចោរកម្មនេះ ដោយសារផ្ទះរបស់គាត់មានបង្កប់កាមេរ៉ាសុវត្ថិភាព។
ម្ចាស់រថយន្តបានបន្តថា ពេលចោរចូលលួចរថយន្តពួកគាត់មិនដឹងឡើយ ដោយសារការលង់លក់ក្នុងដំណេកយ៉ាងស្កប់ស្កល់ លុះព្រឹកឡើងបើកទ្វារផ្ទះបានភ្ញាក់ខ្លួនព្រឺតដោយសារបាត់រថយន្តមិនឃើញទើបបង្កភាពឆោឡោ ហើយគាត់ក៏បើកកាមេរ៉ាសុវត្ថិភាពមើលក៏បានឃើញសកម្មភាពក្រុមចោរមានគ្នាបីនាក់ជិះរថយន្តម៉ាក Luxusពណ៌ស មកចតក្បែរផ្ទះរបស់គាត់ ហើយធ្វើសកម្មភាពកាត់សោរទ្វាររបងចូលលួចយកទៅបាត់តែម្តង។ម្ចាស់ផ្ទះបានបន្តថា រថយន្តដែលចោរលួចទៅបាត់នោះម៉ាកហាយឡិនឌ័រ ពណ៌មាស ពុំទាន់បានបំពាក់ស្លាកលេខនៅឡើយ។
ក្រោយពីមានករណីបាត់រថយន្តស្ថិតក្នុងភូមិសាស្ត្រក្រុងកំពតខាងលើនេះ សមត្ថកិច្ចបាននិងកំពុងដុតដៃដុតជើង តាមប្រមាញ់ស្រាវជ្រាវ រុករកយ៉ាងសស្រាក់សស្រាំ ដើម្បីស្វែងរកក្រុមចោរជំនាញខាងលួចរថយន្តនេះមកចាត់ការតាមនីតិវិធីច្បាប់។
សូមបញ្ជាក់ថា ករណីចោរកម្មលួចរថយន្តស្ថិតក្នុងភូមិសាស្ត្រខេត្តកំពត កន្លងមកពិតជាធ្លាប់កើតឡើងជាហូរហែរ ដែលបានធ្វើឱ្យសមត្ថកិច្ចឈឺក្បាលវិលមុខ ពិបាកកំណត់មុខសញ្ញាផងដែរ។ទន្ទឹមនឹងករណីបែបនេះ សូមម្ចាស់យានយន្តគ្រប់ប្រភេទ ត្រូវមានការប្រុងប្រយ័ត្នឱ្យបានខ្ពស់ ព្រោះបច្ចុប្បន្ននេះក្រុមចោរពិតជាមានជំនាញខ្លាំងមិនធម្មតាឡើយ៕ សេង ណារិទ្ធ