ភ្នំពេញ៖ ឧត្តមសេនីយ៍ទោ សេង ធារិន មេបញ្ជការរង នាយសេនាធិការ យោធភូមិភាគទី៥ នាថ្ងៃទី១០ ខែមិថុនា ឆ្នាំ២០២៤ បានអញ្ជើញទៅសួរសុខទុក្ខ និងនាំយកថវិការបស់ ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ចំនួន ៤.០០០.០០០រៀល ជូនប្រជាពលរដ្ឋ ដែររងរបួសដោយសារជាន់មីន ខណៈក្នុងពេលកំពុងធ្វើសកម្មភាពបាញ់ថ្នាំស្មៅនៅខាងក្រោយផ្ទះ បណ្ដាលឲ្យដាច់ជើងខាងស្ដាំ ស្ថិតក្នុងភូមិសង្គមថ្មី ឃុំថ្មដា ស្រុកវាលវែង ខេត្តពោធិ៍សាត់។

ក្នុងឱកាសអញ្ជើញសួរសុខទុក្ខនេះ មេបញ្ជាការរង នាយសេនាធិការ យោធភូមិភាគទី៥ បានមានប្រសាន៍ផ្តាំផ្ញើត្រូវខិតខំថែបំប៉នសុខភាព ពិសេសអនុវត្តតាមការណែនាំរបស់គ្រូពេទ្យឱ្យបានម៉ឺងម៉ាត់ ដើម្បីឱ្យឆាប់ជាសះស្បើយ វិវត្តទៅរកភាពប្រក្រតីឡើងវិញ។

ជាមួយគ្នានោះដែរ គ្រួសារប្រជាពលរដ្ឋដែលរងគ្រោះ បានថ្លែងនូវក្តីរំភើបគោរពដឹងគុណ និងអរគុណ ចំពោះ ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ព្រមទាំងថ្នាក់ដឹកនាំ នាយទាហាន នាយទាហានរង និងពលទាហានទាំងអស់ របស់យោធភូមិភាគទី៥ ដែលបានយកចិត្តទុកដាក់ចំពោះសុខទុក្ខ និងបាននាំយកថវិកាមកឧបត្ថម្ភជូននៅពេលនេះ គឺបានបង្ហាញពីការយកចិត្តទុកដាក់គិតគូរខ្ពស់ អំពីសុខទុក្ខរបស់ប្រជាពរដ្ឋ ដែលជួបការលំបាក៕