ខេត្តពោធិ៍សាត់៖ មានលេចចេញជាថ្មីម្ដងទៀតហើយលោក ឧកញ៉ា ទ្រី ភាព កាប់ឈើយ៉ាងកក្រើកប្រជាពលរដ្ឋ ក្នុងស្រុកវាលវែង និងស្រុកភ្នំក្រវ៉ាញ ខេត្តពោធិសាត់ ខណៈរដូវកាលឃោសនាបោះឆ្នោតជ្រើសតាំង តំណាងរាស្ត្រខិតជិតមកដល់ តើជាការពិតឬទេ?ក្រុមហ៊ុន (MDS) របស់លោកឧកញ៉ា ទ្រី ភាព ចាប់ផ្ដើមឡើងវិញ កាប់និងដឹកជញ្ជូនឈើជាទ្រង់ទ្រាយធំ នៅខេត្តភាគកណ្ដាល នៃប្រទេសកម្ពុជា បន្តដឹកយកទៅលក់នៅប្រទេវៀតណាមយ៉ាងរលូន។
សេចក្ដីរាយការណ៍ឱ្យដឹងថា នៅពេលបច្ចុប្បន្ននេះ កេរ្តិ៏របស់លោកឧកញ៉ាទ្រី ភាព បានលេចចេញសាជាថ្មីម្ដងទៀត ហើយ ខណៈសេចក្ដីរាយ
ការណ៍អះអាងថា មានមេការធំៗជាពិសេសមេការឈ្មោះ ចន្នីនេះតែម្ដងជាអ្នក ប្រមូលទិញ គ្របរូបភាព និងដឹកជញ្ជូន ចូលទៅក្នុងទីតាងក្រុមហ៊ុន រួចបន្តដឹកទៅលក់នៅឯប្រទេសវៀតណាម។
ក្រុមហ៊ុន លោកឧកញ៉ា ទ្រី ភាពឈូសឆាយ ធ្វើផ្លូវ គ្រប់ច្រកល្ហក ដើម្បីដឹកជញ្ជូនឈើ មានទី១ ផ្លូវ ម្ដុំភ្នំចិនយំ ចូលទៅមាត់ស្ទឹងម្ដុំអង្គតែន០១៦ ។ទី២ ផ្លូវទួលគ្រួស ចេញពីផ្លូវជាតិលេខ៥៦ ត្រង់ចំណុចជិតកន្លែងស្តុបអុស ចូលទៅវាលអន្ទ្រា។
ទី៣ ផ្លូវអន្លុងក្រូច ហៅអន្លុងឃូត។ ទី៤ ផ្លូវចូលទៅ ក្រពើ២ ក្រោម។ ទី៥ ផ្លូវចូលទៅពងពង់ ។ ស្ថិតក្នុងភូមិសាស្ត្រ ស្រុកវាលវែង និងមានផ្លូវជាច្រើនទៀតនៅក្នុងស្រុកភ្នំក្រវ៉ាញ មិនទានបានរៀបរាប់ ។
បើគេចាំមិនភ្លេចទេ លោក ឧកញ៉ា ទ្រីភាព ធ្លាប់បានប្រកាស់បញ្ឈប់អាជ្ញាប័ណ្ណកាប់និងដឹកជញ្ជូនឈើចេញពីក្នុងស្រុកនិងបានធ្វើការព្រមាន ចំពោះក្រុមឈ្មួញណាដែលបានយកឈ្មោះ របស់លោកឧកញ៉ាទៅប្រើប្រាស់ ក្នុងការកាប់និងដឹកជញ្ជូនឈើដោយខុសច្បាប់ ។បន្ទាប់ពីស្ងប់ស្ងាត់អស់មួយរយៈនោះ លោក ឧកញ៉ារូបនេះ បានកាប់ដឹកជញ្ជូនឈើយ៉ាងកក្រើក និងទ្រង់ទ្រាយធំ នៅស្រុកភ្នំក្រវ៉ាញ និងស្រុកវាលវែង នៃទឹកដីខេត្តពោធិ៍សាត ជាងបីខែកន្លងមកហើយនិងបន្តយកទៅលក់នៅប្រទេសវៀតណាម។
គេបានប្រទះឃើញ សកម្មភាពកាប់និង ដឹកជញ្ជូនឈើចេញពីព្រៃតាមរយ:គោយន្តកន្ត្រៃនិងរថយន្តកែឆ្នៃ ដំរីទឹកនិងបង្កុង រួច ស្ទូចដាក់រថយន្តយីឌុបខ្នាតយក្សចេញទៅដោយរលូន ឆ្នងកាត់ខេត្តកំពង់ឆ្នាំង ខេត្តកំពង់ស្ពឺ និងខេត្តកណ្ដាល ជាដើម។
គេនៅចាំបានថាលោក ឧកញ៉ាទ្រី ភាព បន្ទាប់ពីកាប់ឈើក្រញូង និងឈើប្រភេទនាងនួន ស្ទើររលាយផុតពូជអស់នៅកម្ពុជានោះ គាត់ ទទួលបានបណ្ឌឹតកិត្តិយសលើមុខជំនួញ ដ៏ កក្រើក នៅក្នុងសង្គមហ្វេសប៊ុកម្តងរួចមកហើយ ដែលកាលនោះ មានមតិពី គ្រប់មជ្ឈដ្ឋានបានរិះគន់ចំៗថា លោក ឧកញ៉ា ទ្រីភាព ទទួលបានបណ្ឌិតលើមុខជំនាញខាងកាប់បំផ្លាញព្រៃឈើនៅក្នុងប្រទេសកម្ពុជា តែប៉ុណ្ណោះ។
ប្រជាពលរដក្នុង្ឋខេត្តពោធិសាត់បានសម្ដែងនូវការខកចិត្តនិងរិះគន់ ថាក្រោមរូបភាព ឡេសថា ក្រុមហ៊ុនដឹកឈើចាស់បាតឃ្លាំង និងអាជ្ញាប័នហួស សុពលភាព ជាង១០ឆ្នាំមកហើយនោះ ក្រុមហ៊ុន MDS កាប់និងដឹងឈើមិនចេះអស់ ស្ទើរតែរលាយអស់ពីក្នុងព្រៃ នៃជួភ្នំឱរ៉ាល់ ទៅហើយមិនស្កប់ស្កល់ លោកឧកញ៉ា ទ្រី ភាព ទៀត ។
ប្រជាពលរដ្ឋរស់នៅក្នុងស្រុកភ្នំក្រវ៉ាញ បានសម្ដែង ការខឹងនិងអាចឈានដល់ខឹងគោវាយរទេះតែម្ដង ។ ការលើកយករឿងរ៉ាវខាងលើនេះមកធ្វើការចុះផ្សព្វផ្សាយក្នុងគោលបំណង រិះគន់ដើម្បីស្ថាបនានិងចូលរួមការពារថែរក្សាធនធានធម្មជាតិ ជាពិសេសចូលរួម ជាមួយប្រមុខរដ្ឋាភិបាលក្នុងការកែទម្រង់ ប៉ុណ្ណោះ ។
ទោះយ៉ាងណាអង្គភាពព័ត៌មានយើង រង់ចាំទទួល ស្វាគមន៍រាល់កាបកស្រាយ ដើម្បីឆ្លុះបញ្ចាំងការពិត ឲ្យមានភាពសុក្រិតភាពនិងយុត្តិធម៍ និងយោងច្បាប់ស្ដីពីរបប សារព័ត៌មាន ៕