កំពត ៖ យ៉ាងហោចណាស់ក៏មានមនុស្សម្នាក់បានស្លាប់ភ្លាមៗនិងពីរនាក់ទៀតបានរងរបួសធ្ងន់ធ្ងរ ដោសារករណីគ្រោះថ្នាក់ចរាចរណ៍រវាងរថយន្តនិងម៉ូតូ ក្នុងទិសដៅស្របគ្នា ស្ថិតលើកំណាត់ផ្លូវជាតិលេខ៣៣។
គ្រោះថ្នាក់ដ៏រន្ធត់នេះ បានកើតឡើង កាលពីវេលាម៉ោង៤និង៥៥នាទីល្ងាច ថ្ងៃទី១៨ខែមីនា ឆ្នាំ២០១៨ ត្រង់ចំណុចគីឡូម៉ែត្រលេខ១០ខាងលិចផ្សារឡឥដ្ឋប្រមាណ២០០ម៉ែត្រ ក្នុងភូមិកំពង់ត្នោត ឃុំកូនសត្វ ស្រុកទឹកឈូ ខេត្តកំពត។
សាក្សីដែលបានឃើញហេតុការណ៍ខាងលើបាននិយាយថា មុនពេលកើតហេតុ គេឃើញយុវជនបីនាក់ជិះម៉ូតូទំនើបមួយគ្រឿង ម៉ាកសេ១២៥ពណ៌ខ្មៅ ឌុបគ្នា ក្នុងទិដៅពីកើតទៅលិច ក្នុងល្បឿនគួរសម លុះមកដល់ចំណុចគ្រោះថ្នាក់ គេឃើញរថយន្តមួយគ្រឿងម៉ាកTiger បោះពួយមកពីក្រោយក្នងទិសដៅស្រកគ្នា ដោយប្រើល្បឿនលឿនដូចហោះ ស្រាប់តែរថយន្តបង្កខាងលើជ្រុល ទៅបុកម៉ូតូជនរងគ្រោះនៅខាងមុខពេញទំហឹង បណ្តាលឲ្យអ្នកជិះម៉ូតូទាំងបីនាក់ មានអ្នកស្លាប់និងរបួសដេករដូករណែលតែម្តង ។
សាក្សីបានបញ្ជាក់ថា ពេលកើតហេតុរថយន្តនិងម៉ូតូបានខ្ទាតធ្លាក់ទៅស្នាមភ្លោះនៃចញ្ចើមផ្លូវផ្នែកខាងស្តាំដូចគ្នា ទើបម្ចាស់រថយន្តរត់ទៅណាមិនរួច។
ជុំវិញករណីគ្រោះថ្នាក់ចរាចរណ៍ខាងលើ សមត្ដកិច្ចបានឲ្យដឹងថា គឺបង្កឡើងដោយសាររថយន្តម៉ាកTiger ពណ៌ស ពាក់ស្លាកលេខ រដ្ឋ36=2-0300 អ្នកបើកបររថយន្ត ឈ្មោះ យ៉ាន យ៉ា ភេទប្រុស អាយុ៣៥ឆ្នាំ មានទីលំនៅ ភូមិចារ ឃុំក្រវ៉ា ស្រុកសណ្តាន់ ខេត្តកំពង់ធំ។ចំណែកជនរងគ្រោះជិះម៉ូតូម៉ាកC125ពណ៌ខ្មៅ សេរីឆ្នាំ២០១៨ ពាក់ស្លាកលេខ កំពត 1M-4070 ជិះគ្នាបីនាក់ រួមមាន៖ ទី១-ឈ្មោះ ប៊ុន នីវណ្ណា ភេទប្រុស អាយុ២០ឆ្នាំ ជាអ្នកបើកបរ(របួសធ្ងន់)មានទីលំនៅក្នុងភូមិម៉ាក់ប្រាង ឃុំម៉ាក់ប្រាង ស្រុកទឹកឈូ ខេត្តកំពត។ទី២-ឈ្មោះ អន សីុនឧត្តម ភេទប្រុស អាយុ១៦ឆ្នាំ អ្នករួមដំណើរ(ស្លាប់) និងទី៣-ឈ្មោះ ប៊ុន ច័ន្ទតារារិទ្ធ ភេទប្រុស អាយុ១៦ឆ្នាំ អ្នករួមដំណើរ(របួសធ្ងន់) ទាំងពីរនាក់រស់នៅក្នុងភូមិត្រពាំងធំ ឃុំត្រពាំងធំ ស្រុកទឹកឈូ ខេត្តកំពត។
ក្រោយពីវាស់វែង មធ្យោបាយពាក់ព័ន្ធត្រូវសមត្ថកិច្ចនាំយកទៅរក្សាទុកនៅក្នុងអធិការដ្ឋាននគរបាលស្រុកទឹកឈូ សម្រាប់ធ្វើការដោះស្រាយគ្នានៅពេលក្រោយ។ដោយឡែកអ្នករងរបួសធ្ងន់ត្រូវបាននាំទៅដឹកសង្គោះនៅក្នុងមន្ទីរពេទ្យភ្លាមៗ។ចំណែកសពជនរងគ្រោះ ត្រូវបានក្រុមគ្រួសារដឹកទៅកាន់លំនៅដ្ឋាន ដើម្បីរៀបចំធ្វើបុណ្យតាមប្រពៃណី៕
សេង ណារិទ្ធ